Category: Poems

Haathon me aane-aane me,
haay, phisal jaataa pyaalaa,
adhron par aane-aane me,
haay, dhulak jaati haalaa,
duniyaawaalo, aakar meri
kismat ki khoobi dekho,
rah-rah jaati hai bas mujhko
milte-milte madhushala.

praapya nahin hai to, ho jaati
lupt nahin phir kyon haalaa,
praapya nahin hai to, ho jaataa
lupt nahin phir kyon pyaalaa,
door na itni himmat haaru,
paas na itni paa jaayu,
vyarth mujhe daudati maru me
mrigjal bankar madhushala.

madiraalaya me kab se baitha,
pi na sakaa ab tak haalaa,
yatna sahit bhartaa hun, koi
kintu ulat detaa pyaalaa,
manav-bal ke aage nirbal
bhaagya, suna vidyaalaya me,
‘bhaagya prabal, manav nirbal’
ka paat padhaati madhushala.

us pyaale se pyaar mujhe jo
door hatheli se pyaalaa,
us haalaa se chaav mujhe jo
door adhar se hai haalaa,
pyaar nahin paa jaane me hai,
paane ke armaano me !
paa jaataa tab, haay, na itni
pyaari lagti madhushala.

mad, madiraa, madhu, haalaa sun-sun
kar hi jab hun matwaalaa,
kya gati hogi adhron ke jab
neeche aayegaa pyaalaa,
saaki, mere paas na aanaa
mai paagal ho jaaungaa,
pyaasaa hi mai mast, mubaarak
ho tumko hi madhushala.

Ksheen, kshudra, kshanbhangur, durbal
maanav mitti kaa pyaalaa,
bhari hui hai jiske andar
katu-madhu jivan ki haalaa,
mrityu bani hai nirdaya saaki
apne shat-shat kar phailaa,
kaal prabal hai peenewaalaa,
sansriti hai yah madhushala.

yam aayegaa saaki bankar
saath liye kaali haalaa,
pi na hosh me phir aayegaa
sura-visudh yah matwaalaa,
yah antim behoshi, antim saaki,
antim pyaalaa hai,
pathik pyaar se pinaa isko
phir na milegi madhushala.

shant saki ho ab tak, saaki,
pikar kis ur ki jwaalaa,
‘aur, aur’ ki ratan lagaataa
jaataa har pinewaalaa,
kitni ichaayen har jaanewaalaa
chod yahaan jaataa !
kitne armaanon ki bankar
kabr khadi hai madhushala.

jo haalaa mai chaah rahaa thaa,
wah na mili mujhko haalaa,
jo pyaalaa mai maang rahaa thaa,
wah na milaa mujhko pyaalaa,
jis saaki ke peeche mai thaa
diwaanaa, na milaa saaki,
jiske peeche thaa mai paagal,
haa na mili wah madhushala.

dekh rahaa hoon apne aage
kab se maanik – si haalaa,
dekh rahaa hoon apne aage
kab se kanchan kaa pyaalaa,
‘bas ab paayaa!’ – kah-kah kab se
daud rahaa iske peeche,
kintu rahi hai door kshitij-si
mujhse meri madhushala.