Madhushala by Harivansh Rai Bachchan- Part 8

Haathon me aane-aane me,
haay, phisal jaataa pyaalaa,
adhron par aane-aane me,
haay, dhulak jaati haalaa,
duniyaawaalo, aakar meri
kismat ki khoobi dekho,
rah-rah jaati hai bas mujhko
milte-milte madhushala.

praapya nahin hai to, ho jaati
lupt nahin phir kyon haalaa,
praapya nahin hai to, ho jaataa
lupt nahin phir kyon pyaalaa,
door na itni himmat haaru,
paas na itni paa jaayu,
vyarth mujhe daudati maru me
mrigjal bankar madhushala.

madiraalaya me kab se baitha,
pi na sakaa ab tak haalaa,
yatna sahit bhartaa hun, koi
kintu ulat detaa pyaalaa,
manav-bal ke aage nirbal
bhaagya, suna vidyaalaya me,
‘bhaagya prabal, manav nirbal’
ka paat padhaati madhushala.

us pyaale se pyaar mujhe jo
door hatheli se pyaalaa,
us haalaa se chaav mujhe jo
door adhar se hai haalaa,
pyaar nahin paa jaane me hai,
paane ke armaano me !
paa jaataa tab, haay, na itni
pyaari lagti madhushala.

mad, madiraa, madhu, haalaa sun-sun
kar hi jab hun matwaalaa,
kya gati hogi adhron ke jab
neeche aayegaa pyaalaa,
saaki, mere paas na aanaa
mai paagal ho jaaungaa,
pyaasaa hi mai mast, mubaarak
ho tumko hi madhushala.

Leave a Reply

Your email address will not be published. Required fields are marked *