Madhushala by Harivansh Rai Bachchan- Part 5

Saaki ban aati hai praatah
jab arunaa ushaa baalaa,
taarak-mani-mandit chaadar de
mol dharaa leti haalaa,
aganit kar-kirno se jisko
pi, khag paagal ho gaate;
prati prabhaat me purna prakriti me
mukhrit hoti madhushala.

saaki bankar murli aayee
saat liye kar me pyaalaa,
jinme wah chalkaati laayee
adhar-sudha-ras ki haalaa;
yogiraaj kar sangat uski
natwar naagar kahlaaye;
dekho kaiso-kaiso ko hai
naach nachaati madhushala.

vaadak ban madhu ka vikretaa
laayaa sur-sumadhur-haalaa,
raaginiyaa ban saaki aayee
bharkar taaron ka pyaalaa,
vikretaa ke sanketon par
daurdh layon, aalaapon me,
paan karaati shrotaagan ko;
jhankrit veenaa madhushala.

chitrakaar ban saaki aataa
lekar tuli kaa pyaalaa,
jisme bharkar paan karaataa
wah bahu ras-rangi haalaa,
man ke chitra jise pi-pikar
rang-birange ho jaate,
chitrapati par naach rahi hai
ek manohar madhushala.

him shreni angoor lataa-si
phaili, him jal hai haalaa,
chanchal nadiyaan saaki bankar,
bharkar lahron ka pyaalaa,
komal koor-karon me apne
chalkaati nishidin chalti,
pikar khet khade lahraate,
bhaarat paavan madhushala.

Leave a Reply

Your email address will not be published. Required fields are marked *