Madhushala by Harivansh Rai Bachchan – Part 3

Mukh se tu avirat kahtaa jaa
madhu, madira, maadak haalaa,
haathon se anubhav kartaa jaa
ek lalit kalpit pyaalaa,
dhyaan kiye jaa man me sumadhur
sukhkar, sundar saaki kaa;
aur badhaa chal, pathik na tujhko
door lagegi madhushala.

Madira peene ki abhilaashaa
hi ban jaaye jab haalaa,
adharon ki aaturtaa me hi
jab aabhaasit ho pyaalaa,
bane dhyaan hi karte-karte
jab saaki saakaar, sakhe,
rahe na haalaa, pyaalaa, saaki,
tujhe milegi madhushala.

Haathon me aane se pahle
naaz dikhaayegi pyaalaa,
adharon par aane se pahle
adaa dikhaayegi haalaa,
bahutere inkaar karega
saaki aane se pahle;
pathik, na ghabraa jaanaa, pahle
maan karegi madhushla.

Leave a Reply

Your email address will not be published. Required fields are marked *